बार्टीतर्फे अनुसूचित जातीच्या विद्यार्थ्यांना 50 हजाराचे अर्थसहाय्य

नागपूर : या वर्षी अनुसूचित जातीचे जे विद्यार्थी संघ लोकसेवा आयोग नागरी सेवा पूर्व परीक्षा उत्तीर्ण झाले आहेत व बार्टीचे पात्रतेचे निकष पूर्ण करणाऱ्या विद्यार्थ्यांना मुख्य परीक्षेकरिता एकावेळी एक रकमी 50 हजार आर्थिक सहाय्य देण्यात येणार आहे. बार्टीमार्फत मुख्य परीक्षेकरिता देण्यात येणाऱ्या सहाय्यासाठी जे विद्यार्थी पात्र आहेत. त्यांनी बार्टीच्या संकेतस्थळावर भेट देवून पात्रतेचे स्वरुप तपासून, अर्ज डाऊनलोड करावे. अर्जासोबत आवश्यक कागदपत्रे जोडून बार्टीच्या अर्जामध्ये असलेल्या ई-मेलवर 8 डिसेंबर रोजी सायंकाळी 5.30 वाजेपर्यंत अर्ज पाठविण्यात यावेत, असे आवाहन बार्टीचे महासंचालक धम्मज्योती गजभिये यांनी केले आहे.

डॉ. बाबासाहेब आंबेडकर संशोधन व प्रशिक्षण संस्था (बार्टी), पुणे मार्फत राज्यातील अनुसूचित जातीच्या विद्यार्थ्यांकरिता स्पर्धा परीक्षा पूर्वतयारी व प्रशिक्षणाकरिता दरवर्षी मार्गदर्शन व आर्थिक सहाय्य देण्यात येते. संघ लोकसेवा आयोगातर्फे नागरी सेवा पूर्वपरीक्षा 4 ऑक्टोबर रोजी घेण्यात आली व परीक्षेचा निकाल 23 ऑक्टोबर रोजी लोकसेवा आयोगाच्या संकेतस्थळावर घोषित करण्यात आला आहे.