सोलापूरच्या निलेशने सायकलने प्रवास करत गाठली दिल्ली; मुख्यमंत्री अरविंद केजरीवाल यांची घेतली भेट...

दिल्लीचे मुख्यमंत्री अरविंद केजरीवाल यांच्या कार्यामुळे प्रभावित झालेल्या सोलापूरच्या तरुणाने केजरीवाल यांना भेटण्यासाठी सोलापूर ते दिल्ली असा सायकलवरून प्रवास करत थेट दिल्ली गाठली. निलेश संगेपांग असे या तरुणाचे नाव असून त्याने मुख्यमंत्री केजरीवाल यांची भेट घेतली. या भेटी दरम्यान निलेशने 'आप'ने महाराष्ट्रात निवडणुका लढवाव्यात अशी विनंती केजरीवाल यांना केलीय. आपनेही या भेटीबद्दल ट्वीट करत केजरीवाल यांच्या या अनोख्या चाहत्याला शुभेच्छा दिल्या. .

निलेश संगेपांग हा संगमेश्वर महाविद्यालयात बीएचे शिक्षण घेत आहे. एप्रिलच्या पहिल्या आठवड्यात निलेशने सोलापूरहून दिल्लीच्या दिशेने सायकल प्रवास सुरु केला. सायकलवर तिरंगा आणि आप पक्षाचा झेंडा लावत १३ दिवसात निलेशने दिल्ली गाठली. विशेष म्हणजे दिल्लीत पोहचल्यावर या प्रवासाची मुख्यमंत्री केजरीवाल यांनी तात्काळ दखल घेत निलेशला प्रतिसाद दिला. निलेशला मुख्यमंत्री केजरीवाल यांची भेट घेण्याची संधी मिळाली.

आपने महाराष्ट्रातही निवडणुका लढवाव्यात, केजरीवाल यांनी शिक्षण, आरोग्य क्षेत्रात विविध निर्णय येत व्यवस्थेत आमुलाग्र बदल घडवून आणले. दिल्लीत केजरीवाल आणि त्यांच्या आप या पक्षाला यश मिळाले त्यामध्ये या निर्णायांचा खूप मोठा प्रभाव होता. याच प्रतिमेचा फायदा केजरीवाल यांना पंजबामध्येही झाला आणि पंजाबची निवडणुक आपने जिंकली. जे बदल-सुधारणा दिल्लीत केल्या त्या महाराष्ट्रातही कराव्यात अशी त्याने मागणी मुख्यमंत्री केजरीवाल यांच्याकडे केली.