भूतबाधा झाली असल्याची भीती दाखवून आई, मुलगी, मामी आणि आजीवर...; भोंदूबाबाला २० वर्षे कारावासाची शिक्षा

तरुणीला भूतबाधा झाली असल्याची भीती दाखवून उपचाराच्या नावाखाली भोंदूबाबाने एकाच घरातील चार महिलांवर अत्याचार केल्याची घटना नागपूरमध्ये घडली होती. याप्रकरणी पोक्सोच्या विशेष न्यायालयाचे न्यायाधीश ओ.पी.जयस्वाल यांनी भोंदूबाबाला दोषी ठरवून २० वर्षे कारावासाची शिक्षा सुनावली. धर्मेंद्र विठोबा निनावे उर्फ दुलेवाले बाबा (वय ५०, रा. अंबेनगर, भांडेवाडी) असे शिक्षा झालेल्या आरोपीचे नाव आहे.

मिळालेल्या माहितीनुसार पीडिता नेहमी आजारी राहात असल्याने कुटुंबीय चिंतीत होते. भोंदू बाबाची पीडितेच्या वडिलांची ओळख होती.त्यांनी मुलीच्या आजारपणाची माहिती दुलेवाले बाबा याला दिली. त्याने सांगितले की, मुलीला भूतबाधा झाली असून भूताला पळविण्यासाठी २१ दिवसांपर्यंत तांत्रिक पूजा करावी लागेल, असे सांगितले. मात्र पूजा करण्याच्या बहाण्याने दुलेवाला बाबा तरुणील गुंगीकारक औषध खायला देऊन तिच्यावर बलात्कार करीत होता.

काही दिवसानंतर त्याने तरुणीच्या आईला भूतबाधा झाल्याचे सांगून तिच्यावरही बलात्कार केला. त्यानंतर तरुणीच्या मामीलाही जाळ्यात ओढले. तिच्यावर धार्मिक पूजा करण्याच्या बहाण्याने बेशुद्ध करून बलात्कार केला. तरुणी तिची आई आणि मामी यांना भूत काढण्याच्या बहाण्याने चंद्रपूर, छत्तीसगड आणि डोंगरगाव येथे घेऊन गेला. तेथे गुंगीचे औषध देऊन तिघींवरही रात्रीला बलात्कार करीत होता.

दुलेवाले बाबाने कुटुंबातील सर्वच महिलांशी शारीरिक संबंध प्रस्थापित केले होते. त्याची हिम्मत एवढी वाढली की त्याने तरुणीच्या ६० वर्षीय आजीलाही सोडले नाही. आजीवरही पूजा करण्याच्या बहाण्याने बलात्कार केला. तरुणीने आईला ही बाब सांगितली. त्यानंतर मामी आणि आजीलाही विचारणा केली. त्यानंतर पोलिसांत तक्रार देण्याचा निर्णय केला. अखेर कुटुंबातील महिलांनी एकमेकींशी चर्चा केली आणि चौघांवरही त्याने लैंगिक अत्याचार केल्याचे समोर आले.

९ जानेवारी २०२१ रोजी पीडित तरुणीच्या तक्रारीवरून तत्कालीन पोलीस निरीक्षक सुनील गांगुर्डे आणि पोलीस उपनिरीक्षक प्रियंका गोदमले यांनी प्रकरणी गुन्हा दाखल करत भोंदूबाबाला अटक केली. त्याने चौघींवर बलात्कार केल्याची कबुली दिली. याप्रकरणी पोलिसांनी तपास करून आरोपपत्र दाखल केले. न्यायालयाने दुलेवाला बाबा याला पोक्सो व अत्याचार प्रकरणात २० वर्षे सश्रम कारावासाची शिक्षा सुनावली. पोलीस हवालदार उमेश मेश्राम आणि भास्कर बनसोड यांनी तपासात सहकार्य केले.