गॅस सिलिंडर पुन्हा महागला; जानेवारीपासून सिलिंडरच्या किमतीत तब्बल १६५ रुपयांनी वाढ

नवी दिल्ली : कोरोनाच्या प्रादुर्भावामुळे सर्वाचेच अर्थचक्र बिघडले आहे. अशात बुधवारी पुन्हा एकदा स्वयंपाकाच्या गॅस सिलिंडरच्या किमतीत २५ रुपयांनी वाढ करण्यात आली. मागील दोन महिन्यांतील ही दुसरी दरवाढ आहे. नव्या दरवाढीमुळे, १४.५ किलोग्रॅम वजनाच्या अनुदानित सिलिंडरची किंमत मुंबईत ८५९.५०, तर दिल्लीत ८५९ रुपये होईल. कोलकाता व चेन्नईत याच किमती अनुक्रमे ८८६ रुपये व ८७५.५० रुपये होतील.

याआधी १ जुलैला सिलिंडरच्या किमतीत २५.५० रुपयांनी वाढ करण्यात आली होती. १ ऑगस्टला संसदेचे अधिवेशन सुरू असल्याने, विरोधकांचा रोष टाळण्यासाठी गॅस सिलिंडरच्या किमती वाढवण्यात आल्या नाहीत, असे सूत्रांनी सांगितले. अनुदानित गॅस सिलिंडरच्या किमतीत १ जानेवारीपासून एकूण १६५ रुपयांनी वाढ करण्यात आली. घरगुती गॅसच्या किमती दर महिन्यानी वाढवून सरकारने त्यावरील अनुदान समाप्त केले. त्यामुळे याचा फटका सर्वसामान्यांना बसत आहे.