नादच खुळा.... हायवेवर भले मोठे होर्डिंग लावत प्रेयसीला केलं प्रपोज

लग्नासाठी प्रपोज करण्याच्या आजपर्यंत अनेक पद्धती आपण पहिल्या आहेत. मात्र कोल्हापूरातल्या एका तरुणाने आपल्या प्रेयसीला लग्नासाठी अनोख्या पद्धतीने प्रपोज केलं आहे. कोल्हापूर- सांगली हायवेवर त्याने ५० बाय २५ आकाराचे होर्डिंग लावले. होर्डिंगवर 'मॅरी मी उत्कर्षा ' असं लिहिलं. त्यानंतर होर्डिंग लावलेल्या ठिकाणी नेऊन प्रेयसीला सरप्राईज दिलं. इतकंच नाही तर गुडघ्यावर बसून प्रपोजही केलं.

कोल्हापूरमधील सौरभ कसबेकर आणि सांगली मधील उत्कर्षा. दोघेही बुधगाव-सांगली इथल्या वसंतरावदादा पाटील इन्स्टिट्यूट ऑफ टेक्नॉलॉजी या इंजिनिअरिंग कॉलेजमध्ये शिक्षण घेत होते. सौरभची आणि उत्कर्षाची शेवटच्या वर्षापर्यंत सुद्धा काही खास ओळख नव्हती. मात्र जेंव्हा इंजिनिअरिंग पूर्ण झाले तेंव्हा सौरभच्या घरच्यांनी कोणी असेल तर सांग आम्ही रीतसर मागणी घालू असे म्हंटल्यानंतर त्याने तात्काळ आमच्या कॉलेजमधील उत्कर्षा नावाची मुलगी आहे असं आपल्या घरच्यांना सांगितलंय. घरच्यांनीही हरकत न घेता मुलीला विचारण्याचं ठरवलं.

सौरभला उत्कर्षा आवडत असल्याने त्याच्या वडिलांनी उत्कर्षाच्या घरी जाऊन बोलणी केली. पण उत्कर्षाच्या घरच्यांनी काही दिवस विचार करुन लग्नासाठी होकार कळवला. मात्र लग्नासाठी अनोख्या पद्धतीने उत्कर्षाला प्रपोज करयाचं असं सौरभने ठरवलं होतं. त्यानुसार त्याने अनोकी शक्कल लढवली. कोल्हापूर सांगली हायवेवर त्याने एक भला मोठा होर्डिंग लावला. होर्डिंगवर ' मॅरी मी उत्कर्षा - सौरभ' असं लिहिलं. हायवेवरुन येणाऱ्या जाणाऱ्यांसाठी हे होर्डिंग उत्सुकतेचा विषय ठरलं.

त्यानंतर सौरभने उत्कर्षाला होर्डिंग लावलेल्या ठिकाणी नेऊन तिला सरप्राईज दिलं. इतकंच नाही तर सौरभवने गुडघ्यावर बसून प्रपोज केलं. या अनोख्या स्टाईलने उत्कर्षाला आनंदाचा धक्का बसला. तिने तात्काळ सौरभला होकार दिला. यानंतर या दोघांनी होर्डिंग समोर येऊन एकत्र फोटो सुद्धा काढला. या अनोख्या लव्ह स्टोरीची संपूर्ण जिल्ह्यात एकच चर्चा सुरू आहे.