कारचा भीषण अपघात; एकाच कुटुंबातील चौघांचा मृत्यू

चालकाचे नियंत्रण सुटल्याने कार रस्त्याच्या बाजूला असलेल्या खोल खड्ड्यामध्ये जाऊन आपटली. आणि भीषण अपघात झाला. बुधवारी रात्री १० वाजण्याच्या सुमारास बीड- अहमदनगर रस्त्यावर धामणगाव जवळील वळणावर हा अपघात झाला. या अपघातात बीड शहरातील प्रसिद्ध व्यावसायिक टेकवाणी कुटुंबातील चौघे जागीच ठार झाले.तर एक जण जखमी झाला असुन त्याला उपचारासाठी दाखल करण्यात आले आहे.

बीड शहरातील प्रसिद्ध व्यापारी शंकर शेठ टेकवाणी हे काही कामानिमित्त क्रेटा कारने बुधवारी (११ एप्रिल २०२२) सायंकाळी सातच्या सुमारास घरून नगरला जाण्यासाठी निघाले. यावेळी त्यांच्या सोबत दोन भाऊ व दोन पुतणे असे पाच जण होते. रात्री दहाच्या सुमारास नगर रस्त्यावरील धामणगाव गावाजवळ असताना चालकाचे गाडीवरील नियंत्रण सुटले. गाडी रस्त्याच्या बाजूला खोल खड्ड्यामध्ये जाऊन आपटली. या अपघातात शंकर शेठ टेकवाणी (वय ५५), त्यांचे बंधू सुनील टेकवाणी (वय ५०), सतीश टेकवाणी (वय ४८ ), तर पुतण्या लखन महेश टेकवणी (वय ३०. सर्व रा. कारंजा, बीड) या चौघांचा जागीच मृत्यू झाला. मृत शंकर टेकवणी यांचा मुलगा निरज (वय २० वर्षे) हा मात्र या भीषण अपघातात थोडक्यात बचावला. त्याला उपचारासाठी दाखल करण्यात आले आहे.

गाडी खड्ड्यामध्ये पडल्यानंतर मोठा आवाज झाल्याने जवळच्या लोकांनी घटनास्थळाकडे जाऊन गाडीतून अडकलेल्या लोकांना बाहेर काढले आणि जखमींना रुग्णालयात पाठवले. अपघातात गाडीचा पूर्णपणे चेंदामेंदा झाल्याने अपघाताची भीषणता लक्षात येते.

बीड शहरात टेकवाणी कुटुंबाची दिव्य गार्डन, जनरल स्टोअर्स यासह अनेक व्यावसायिक दुकाने आहेत. टेकवाणी बंधुंचा सामाजिक कामातील सहभागही चांगला असायचा. त्यामुळे त्यांचा संपर्क मोठा होता. एकाच वेळी कुटुंबातील करत्या तीन पुरुषांचा मृत्यू झाल्याने हळहळ व्यक्त होत आहे.