टँकर आणि ट्रकचा भीषण अपघात; ९ जणांचा होरपळून मृत्यू

डिझेल वाहतूक करणारा टँकर आणि लाकूड नेणाऱ्या ट्रकची समोरासमोर धडक होऊन झालेल्या अपघातात ९ जणांचा आगीत होरपळून मृत्यू झाला. चंद्रपूर-मूल मार्गावरील अजयपूर गावाजवळ गुरुवारी मध्यरात्री हा अपघात झाला. अपघातानंतर टँकरमधील डिझेलमुळे भीषण आगीचा भडका उडालाय. ट्रकचे टायर फुटल्याने आग अधिकच पसरली. मूल-चंद्रपूर अग्निशमन पथकाने मोठ्या प्रयत्नांनंतर ही आग विझवली. या आगीत मृत पावलेल्या प्रवाशांचे मृतदेह जळून खाक झाले.

गुरुवार १९ मे ला रात्री १०.३० वाजताच्या सुमारास वडसा वरून चंद्रपूरला लाकूड घेऊन येणारा ट्रक ( एमएच ३१ सीक्यू २७७०) आणि चंद्रपूरवरून मूलकडे जाणारा डीझल टँकर ( एमएच ४० बीजी ४०६०) या दोन वाहनांची समोरासमोर जोरदार धडक झाल्याने ट्रक ला आग लागली. आगीने बघता बघता भीषण रूप धारण केल्याने संपूर्ण ट्रक व त्यामध्ये असलेले ९ जण जळून खाक झाले.

लाकडाच्या ट्रकमधील वाहन चालक अजय डोंगरे (रा. बल्लारपूर), प्रशांत नगराळे, मंगेश टिपले, महिपाल परचाके, बाळकृष्ण तेलंग, साईनाथ कोडापे, संदीप आत्राम अशी अपघातातील मृतांची नावे असून हे सर्व मजूर लाकूड उतरविण्यासाठरी चंद्रपूरला येत होते. तर टँकर मधील वाहनचालक हनिफ खान , अजय पाटील वर्धा हे दोघेही ट्रकला लागलेल्या आगीत होरपळून मृत पावले.