मुंबईत फटाके फोडण्यास बंदी, महापालिकेनं काढले परिपत्रक

मुंबई : देशभरात कोरोनामुळे दिवाळी साजरी करण्यावर निर्बंध आले आहेत. काही राज्यांमध्ये दिवाळीत फटाके फोडण्यावर बंदी घालण्यात आली आहे. दिवाळी काही दिवसांवर आली असताना आता मुंबई महापालिकेनेही परिपत्रक काढत मुंबईतही फटाक्यांवर बंदी घातली आहे. फटाक्यांच्या धुरामुळे कोरोना रुग्णांना श्वास घेण्यासाठी त्रास होऊ शकतो. त्यामुळे हा निर्णय घेण्यात आला आहे.

१४ नोव्हेंबर २०२० रोजी फक्त लक्ष्मीपूजनाच्या दिवशी सायंकाळी सोसायटीचे अंगण / घराचे अंगण इत्यादी खासगी परिसरांमध्येच सौम्य स्वरूपाचे फटाके जसे की, फुलबाजी (फुलझडी), अनार (कोठी / झाड) यासारखेच फटाके फोडण्यास मर्यादित स्वरूपात परवानगी देण्यात येत आहे. मात्र, हे करताना नागरिकांनी कोविड विषयक आवश्यक ती खबरदारी कटाक्षाने घ्यावयाची आहे. यामध्ये प्रामुख्याने मास्क वापरणे, सोशल डिस्टन्स पाळणे व हात स्वच्छ धुणे इत्यादी बाबींची काळजी घ्यावयाची आहे. असं या परिपत्रकात म्हटले आहे.